•  
  •  
 

Malay Journal

Abstract

Nakapaloob sa Mother Tongue Based-Multilingual Education (MTB-MLE) ang isang patakarang pangwika na may kinalaman sa paggamit ng wikang panturo sa antas primarya ng edukasyon sa Pilipinas. Sinimulan ang hakbang sa paghahanda sa bansa nang inilabas ang Department Order 74, s. of 2009. Naipatupad noong 2012 ang MTB-MLE sa bansa bilang bahagi ng K to 12 na kurikulum. Ang pag-aaral ay naglalayon na masuri at maebalweyt ang mga ginawang paghahanda at pagpapatupad ng MTB-MLE upang makita ang mga hamon at makatulong sa paghahanap ng mga mungkahi para sa mas mabisang paraan sa pagpapatupad nito. Sinuri nito ang gap sa paghahanda at pagpapatupad mula taong 2012 hanggang taong 2015 ayon sa pagsusuri ng dokumento at sa naratibo ng karanasan ng mga guro. Ang pag-aaral ay nakasandig sa pananaliksik ni Joan Rubin (1971) sa pagpaplanong pangwika. Ayon kay Rubin, ang proseso ng ebalwasyon sa pagpaplanong pangwika ay ang (1) malawakang paghahanap ng datos; (2) pagpaplano ng layunin, estratehiya, at outcomes; (3) implementasyon; at (4) feedback. Ang mga datos sa pag-aaral na ito ay nakalap sa pamamagitan ng pagsusuri ng mga primarya at sekundaryang dokumento, pakikipanayam, survey, at focus group discussion (FGD). Sinuri ang mga datos sa pamamagitan ng Thematic Analysis at Strength, Weakness, Opportunity, and Threat (SWOT) Analysis. Ilan sa mga iminumungkahi sa pag-aaral ay ang ang re-training at tuloy-tuloy na pagsasanay ng mga guro para sa MTB-MLE, lalong palawakin ang kamalayan ng komunidad tungkol dito, at pagtibayin ang pakikisangkot ng lokal na pamahalaan sa mga gawain para dito. Kailangang magkatugma ang mga estratehiya ng pagpaplano at pagpapatupad, at ang mga layunin ng programa sa lingguwistiko, ekonomiko, at kultural na kondisyon ng komunidad.

Download

Share

COinS